Türkmenistanyň Magtymguly adyndaky Ýaşlar guramasynyň Merkezi Geňeşiniň www.yashlar.gov.tm internet web-saýtynda Milli bahar baýramy mynasybetli “Mirasym bar – sarpam bar” ady bilen geçirilen döredijilik bäsleşiginde saýlanan eserleriň biri:
WATAN
Ösüşleriň bedew batly,
Bagta sary ýoluň Watan.
Arkadagyň saýasynda,
Bagtyýardyr iliň Watan.
***
Garagumy gursagynda,
Hazary bar tirseginde,
Derýalary sol-sagynda,
Belent dagly biliň Watan.
***
Kakyp ýazda gök depregin,
Ýagmyr ýagan bu topragyň,
Kokusy deý erem bagyň,
Müşki anbar gülüň Watan.
***
Güllerden alnan boýagy,
Joşa getirer ýüregi,
Türkmeniň ýüzniň tuwagy,
Dünýä belli halyň Watan.
***
Bezeg berip boz meýdana,
Gezer munda ner, arwana,
Şypa bolan il derdine,
Taýsyz düýe çalyň Watan.
***
Gözel mekan jennet kybap,
Ýaz damjasy misli gülap,
Şähdiň açar ýüziň sypap,
Säher öwsen ýeliň Watan.
***
Jennet görkün görmek islän,
Saňa gelsin Türkmenistan.
Ýazsaň azdyr müň bir dessan,
Läle sagy-soluň Watan.
***
Ösüp diýar galka-galka,
Bagty gülüp bakdy halka,
Il-gününe dagdan arka,
Merdi-merdan ogluň Watan.
Seýitmämmet BERDIMÄMMEDOW,
Türkmenistanyň Içeri işler ministrliginiň institutynyň hukuk fakultetiniň 3-nji ýyl talyby.
