Milli Liderimiziň halkymyzyň gadymyýetiniň yzlaryny häzirki Berkarar döwletimiziň bagtyýarlyk döwri bilen baglanyşdyryp çeper beýan edýän «Türkmeniň döwletlilik ýörelgesi» atly täze kitabynyň halk köpçüligine hödürlenmegi ajaýyp zamanamyzyň rowaçlyklary hem-de şanly taryhymyzyň şöhratly sahypalary bilen ýakyndan we içgin tanyşmaga giň mümkinçilik berdi.
Pähim-paýhasly, dürdäne setirleri öz içine alýan bu gymmatly kitabyň mazmuny buýsançly sözleri, döwletliligiň kada-kanunlaryny wagyz edýän setirleri, türkmene mahsus aýratynlyklary halkymyza ündeýän şahyrana jümleleri özünde jemleýär. Jemgyýetçilik durmuşyny seljerip, ondan tejribe almaga mümkinçilik berýän bu ajaýyp eser ýurdumyzyň dünýä halklary bilen dostana gatnaşyklaryna hem özüniň oňyn täsirini ýetirýär. Munuň şeýledigine Gahryman Arkadagymyzyň kitabyň «Dostluk — asylly ýörelge» atly bölümindäki «Halklaryň we döwletleriň arasyndaky dostluk dünýäde ynsanperwerligi ýola goýýan taglymatdyr. Çünki bu dostluk döwletleriň ählumumy ýörelgelere ygrarlylyk babatda bitewüleşmegidir. Dostluk — adamzadyň ýakynlaşmagynyň ýoly. Dostluk — asylly ýörelgeleriň ebedi dowam etmeginiň ýoly» diýen parasatly jümlelerinden hem aýdyň göz ýetirmek bolýar. Ýurt Baştutanymyzyň nygtaýşy ýaly, türkmen halky — myhmansöýerligiň belent nusgasyny görkezýär. Myhmansöýerlik düşünjesi ýaly halkymyza mahsus bolan, arkama-arka dowam edip gelýän asylly ýörelgeleri nesilleriň aňyna ornaşdyrmakda hem-de ýaşlaryň bu asylly ýörelgeleri dowam etdirmeklerini gazanmakda bu kitabyň ähmiýeti örän uludyr.
Halkymyzyň medeni we ruhy taýdan galkynmagyna uly ýardam edýän bu ajaýyp kitapda ösüşli ýollaryň nurana keşbi çeper suratlandyrylýar. Garaşsyz döwletimiziň ýeňişli ýollaryndan rowaçlanýan bagtyýar günleriň buýsanjy watançylyk duýgusynda sünnälenip beýan edilýär. Esasan-da, kitabyň «Manysyny tirmegi okyja goýan rowaýatlarym» atly soňky bölüminde jemlenen rowaýatlardyr hekaýalar okyjynyň ünsüni özüne çekýär. Olar durmuşyň islendik hadysasyndan ugurtapyjylyk bilen baş alyp çykmagy öwredýär.
Okyjylaryň çuňňur söýgüsini gazanan bu kitapdaky «Bagban» atly rowaýaty aýdylanlara mysal hökmünde görkezmek bolar. Rowaýatda beýan edilişine görä, bir kazy bir oglany özüne bagban tutýar. Bir gezek myhmanlar gelende, kazy öz bagbanyna üzüm ýygyp gelmegi tabşyrýar. Oglan üzüm alyp gelýär. Ýöne ol tagamsyz eken. Şonuň üçin ol myhmanlara ýaramaýar. Kazy oňa süýji üzüm getirmegi tabşyrýar. Emma oglan bagban bolsa-da üzümiň süýjüsini, turşusyny bilmeýär eken. Çünki ol üzümden bir gezegem dadyp görmändir. Kazy onuň sebäbini soranda: «Eý, kazym! Siz maňa «Bu baga bagban bol» diýdiňiz. Bu bagdan üzüm iý diýmediňiz ahyry» diýipdir. Kazy myhmanlaryny ugradyp, öýüne gelýär. Ol bagbany çagyryp, oňa ähli mal-mülküni bagyş edýär. Gyzyny hem oňa nikalap berýär.
Rowaýatdan hem görşümiz ýaly, bagban oglanyň köpçülikde özüni alyp barşy, dogruçyllygy, edep-ekramy bilen ähli adamy haýran galdyryşy türkmen ýigidine mahsus häsiýetdir. Şeýle äheňdäki rowaýatlar, hekaýatlar we tymsallar ata Watanymyzyň geljegi bolan ýaş nesilleri terbiýelemekde özboluşly mekdepdir.
Garaşsyz, hemişelik Bitarap Watanymyzyň şan-şöhratyny, halkymyzyň mukaddes ýörelgelerini çeper wasp edip, ýurdumyzyň dünýä ýüzündäki abraýyny has-da belende göterýän hormatly Prezidentimiziň jany sag, ömri uzak, tutumly işleri rowaç bolsun!
Enejan AGAMYRADOWA,
Halkara ynsanperwer ylymlary we ösüş uniwersitetiniň žurnalistika hünäriniň talyby.
“Nesil” gazeti,
24.10.2020ý.
