Berkarar döwletimiziň bagtyýarlyk döwründe hormatly Prezidentimiziň alyp barýan pähim-paýhasly syýasaty, amala aşyrýan il-ýurt bähbitli işleri medeniýet we sungat ulgamynyň hünärmenlerini döredijilikli işlemäge ruhlandyrýar. Türkmenistanyň Medeniýet ministrliginiň garamagyndaky çagalar sungat mekdeplerini 2020-2021-nji okuw ýylynda tamamlajak okuwçylaryň arasynda dürli hünär-ugurlar boýunça geçiriljek bäsleşik ýurdumyzda saz sungatyna höwesli zehinli ýaşlary ýüze çykarmak, olaryň ukyp derejesini ýokarlandyrmak, ýerine ýetirijilik başarjaňlygyny ösdürmek maksady bilen «Halypa ýörelgesi – şägirt göreldesi» atly döredijilik bäsleşigi geçirilýär.
Bäsleşige gatnaşmak üçin resminamalary 2021-nji ýylyň 10-njy apreline çenli Türkmenistanyň Medeniýet ministrliginiň okuw mekdepleri, muzeýler we kitaphanalar bölümine ýollanmalydyr.
Bäsleşigiň 1-nji saýlama tapgyry çagalar sungat mekdeplerinde geçirilip, saýlanan çagalaryň wideo ýazgylary Türkmenistanyň Medeniýet ministrliginiň okuw mekdepleri, muzeýler we kitaphanalar bölümine ibermelidirler.
Bäsleşigiň 2-nji saýlama tapgyry wideo ýazgylary diňlemek arkaly eminler topary tarapyndan saýlanyp jemleýji tapgyra hödürlener.
Bäsleşik baradaky doly maglumatlar Türkmenistanyň Medeniýet ministrliginiň www.medeniyet.gov.tm resmi saýtynda ýerleşdirilen.
