Arkadagly Gahryman Serdarymyzyň parasatly hem-de öňdengörüjilikli syýasaty netijesinde ýurdumyz okgunly öňe barýar, eziz Diýarymyzyň hemmetaraplaýyn gülläp ösmegi, halkymyzyň abadan, bolelin, eşretli durmuşda ýaşamagy üçin döwrebap şertler döredilýär. Hormatly Prezidentimiz 2023-nji ýylyň noýabr aýynyň 30-na Ministrler Kabinetiniň sanly ulgam arkaly nobatdaky mejlisinde şu ýylda bilimde, ylymda, sportda, medeniýetde, senagatda, oba hojalygynda, ykdysadyýetimiziň beýleki pudaklarynda ýaş nesliň wekilleriniň uly üstünliklere eýe bolýandygyny, diňe bir ýurdumyzda däl eýsem, halkara derejeli ýaryşlarda, olimpiadalarda-da döwletimiziň tuguny belende parladyp, uly ýeňişler gazanýandyklaryny kanagatlanma bilen belläp geçdi we Arkadag Serdarly bagtyýar ýaşlar ýylynyň ahyrynda dabaraly maslahat we sergi geçiriljekdigini nygtady. Dabaraly maslahatyň dowamynda ýaşlaryň alyp baran işlerine, gazanan netijelerine mynasyp baha beriljekdigini, olary sylaglamak bilen, geljekki uly üstünliklere ýol açyljakdygyny nygtady.
Şu nukdaýnazardan 2023-nji ýylyň dekabr aýynyň 20-ne Balkan welaýat häkimliginiň «Bagt köşgi» toý dabaralary merkezinde Türkmenistanyň Magtymguly adyndaky Ýaşlar guramasynyň Balkanabat şäher Geňeşi, Balkanabat şäher häkimligi we Balkanabat şäher Medeniýet bölümi bilen bilelikde gurnamagynda aýdym-sazly duşuşyk geçirildi. Geçirilen çärede Arkadag Serdarly bagtyýar ýaşlar ýylyna bagyşlanan Halkara ylmy maslahat, sergiler we dabaralar dogrusynda şeýle hem ýetip gelen täze 2024-nji ýyly mynasyp garşy almak bilen baglanyşykly çykyşlara giň orun berildi. Çäräniň dowamynda Balkanabat şäher Medeniýet bölüminiň aýdymçylary buýsançly aýdymlary ýerine ýetirdiler. Aýdym-sazlar bilen utgaşyp giden çäräniň ahyrynda çykyş edenler ýaşlar üçin döredip berýän giň mümkinçilikleri üçin Gahryman Arkadagymyza, Arkadagly Gahryman Serdarymyza tüýs ýürekden alkyş aýtdylar.
Oraz MÄMMEDOW,
TMÝG-niň Balkan welaýatynyň Balkanabat şäher Geňeşiniň
Guramaçylyk bölüminiň sanly ulgam boýunça esasy hünärmeni.
