Ýaňy-ýakynda Türkmenistanyň Magtymguly adyndaky Ýaşlar guramasynyň Daşoguz welaýat Geňeşi Türkmenistanyň Agrar partiýasynyň Daşoguz welaýat komiteti bilen bilelikde, Daşoguz welaýat kitaphanasynda akyldar şahyr Magtymguly Pyragynyň heýkeliniň açylyş dabarasyny ýaşlaryň arasynda wagyz etmek maksady bilen, «Arzuwlan zamanaň geldi, Pyragy» atly «tegelek stoluň» başyndaky söhbetdeşlik çäresini geçirdi. Ony Ýaşlar guramasynyň ýerli Geňeşiniň baş hünärmeni Nurýagdy Galpakow alyp bardy. Söhbetdeşlige Daşoguz welaýat Baş bilim müdirliginiň baş hünärmeni, Ilkinji Ýaşlar guramasynyň başlygy Röwşen Ýoldaşow, Daşoguz şäheriniň daşary ýurt dillerine ýöriteleşdirilen 29-njy orta mekdebiniň müdiri Derkar Annaberdiýew, şol mekdebiň mugallymy Hangeldi Piriýew dagylar gatnaşdylar. Onda çykyş edenler halkymyzda we dünýäde Magtymguly Pyraga goýulýan belent sarpa, paýtagtymyz Aşgabadyň gözel künjeginde, Köpetdagyň eteginde türkmeniň beýik oglunyň, Gündogaryň meşhur akyldarynyň ajaýyp heýkeliniň we nusgawy şahyryň adyny göterýän medeni-seýilgäh toplumynyň dabaraly hem-de şowhunly açylyşy, bu ýeriň ýurdumyzyň raýatlarynyň, daşary ýurtly myhmanlaryň iň gelim-gidimli ýerleriň birine öwrüljekdigi, seýilgäh toplumynyň Watanymyzyň döredijilik kuwwatyny täze belentliklere götermekde möhüm ähmiýete eýe boljakdygy barada buýsançly hem-de giňişleýin gürrüň berdiler.
Magsat OTUZOW,
TMÝG-niň Daşoguz welaýat Geňeşiniň başlygy,
Türkmenistanyň Mejlisiniň deputaty.
