Eziz Watanymyzda erkana ýaýnaýan bagtyýar çagalar mähir, söýgi, alada bilen gurşalýar. Geljegimiziň aýdyň bolmagy üçin ýaş nesillerimiz barada edilýän alada şu günki günde hem döwletimiziň öňde goýýan esasy wezipelerinden biridir. Şonuň üçin hem bagtyýar nesilleriň rahat dynç almaklary, okap-öwrenmekleri, döretmekleri, ylymly-bilimli, giň dünýägaraýyşly, sagdyn bedenli, ata Watana wepaly ýaşlar bolup ýetişmekleri üçin ähli şertler, mümkinçilikler döredilýär.
Häzirki wagtda tomusky dynç alyş günlerine gadam basan bagtyýar çagalar diňe bir «Dürdäne» çagalar sagaldyş we dynç alyş merkezinde däl, eýsem, ýurdumyzyň dürli künjeklerinde hereket edýän çagalar sagaldyş we dynç alyş merkezlerinde dynç alyp, öz wagtlaryny gyzykly hem manyly geçirýärler. Türkmenistanyň Magtymguly adyndaky Ýaşlar Guramasynyň Balkan welaýatynyň Gyzylarbat etrap Geňeşiniň gurnamagynda Gyzylarbat etrabynyň çäginde ýerleşýän «Dürdäne» çagalar sagaldyş we dynç alyş merkezinde, bu ýere tomusky dynç alyş möwsüminde dynç almana gelen çagalaryň arasynda daşky gurşawyň gymmatyny, tebigatymyzyň gözelligini olara ýakyndan tanatmak, beden we ruhy taýdan sagdyn nesilleri terbiýeläp ýetişdirmek maksady bilen Daşky gurşawy goramagyň bütindünýä güni mynasybetli «Tebigat – biziň öýümiz» atly gezelenç duşuşygy geçirildi. TMÝG-niň Gyzylarbat etrap Geňeşiniň hünärmenleriniň gatnaşmagynda dynç alýan körpejelerimiz bilen tebigatymyzyň gözelligini, tebigatymyza we daşky gurşawa zeper ýetirmezlik, ony aýawly saklamak barada çagalar bilen giňişleýin gürrüňdeşlik geçirildi, şeýle hem berkarar döwletimizde beden we ruhy taýdan sagdyn nesilleriň ýetişmegi üçin ägirt uly işleri durmuşa geçirýän türkmen halkynyň Milli Lideri Gahryman Arkadagymyza, Arkadagly Gahryman Serdarymyza sagbolsun aýdyldy.
Altynaý MÄMMETNAZAROWA,
TMÝG-niň Balkan welaýatynyň Gyzylarbat etrap Geňeşiniň
Guramaçylyk bölüminiň sanly ulgam boýunça esasy hünärmeni.
