Öňem bir adam agyr halda, hassa ýatyrka, mirasdüşer iki ogluny ýanyna çagyrypdyr.
– Ynha, bir küýze altyn. Ynha-da, bäş tanap ýer. Ylalaşyp özüňiz bölüşiň! Menden size galjak bar baýlyk şular – diýip, olara eýeçilik etmegi tabşyrypdyr.
Oglanlaryň kiçisi edeplilik bilen:
– Ilki agam saýlasyn, ol – uly, menem ondan soň galanyny alaryn – diýipdir.
Agasam:
– Ýok, ýeke inim bar, ol ilki göwnüne geňeşsin – diýip, oňa mähirli gözüni aýlapdyr.
Olaryň ýanynda gelinleri hem bar ekeni. Doganlaryň kiçisiniň gelni:
– Atasy, ogullaryňy deň tutjak bolsaň, altynam, ýerem deň iki bölüp ber. Küýzedäki kör altyn, ýerem köpelýän altyndyr. Altyny alan ogluň sowup gutaransoň garyp düşer, ýeri alan ogluňam halal zähmet çekip bilse, baýamak bilen bolar – diýip, pyşyrdapdyr.
Bulary diňläp ýatan hassanyň gözi nurlanypdyr. Ol hassalykdan hem aýňalan ýaly bolupdyr. Kiçi gelniň pikirini diňläp, olardan göwni bitipdir.
