Ýagşa – ýanaş, ýamandan – daşlaş.
* * *
Ýagşa duşsaň, ozarsyň, ýamana duşsaň, tozarsyň.
* * *
Ýagşa ýagşy diý, bereketi artsyn,
Ýamana ýagşy diý, pälinden gaýtsyn.
* * *
Ýagşa berseň gyzyňy, söýer-sylar soltan eder,
Ýamana berseň gyzyňy, urar-söger oltaň eder.
* * *
Ýagşa garalyk ýokmaz, ýamana il bakmaz.
* * *
Ýagşy ýigit iş üstüne geler, ýaman ýigit – gep üstüne.
* * *
Ýagşa igenseň, iňňe dek bolar, ýamana igenseň – ner dek.
* * *
Ýagşa taý tapylmaz, ýamana – ýaran.
* * *
Ýagşa ýoldaş bolsaň, işiň biter,
Ýamana ýoldaş bolsaň, başyň gider.
* * *
Ýagşy adam aý bolar, nirä barsa jaý bolar.
* * *
Ýagşy adam gününi geçir, ýaman adam goňşusyny göçir.
* * *
Ýagşy adamyň ýagşylygy deger dar ýerde,
Ýaman adamyň ýamanlygy deger her ýerde.
* * *
Ýagşy atyň dişini görme, ýagşy kişiň ýaşyny sorama.
* * *
Ýagşy aýal arpa ununy aş eder, ýaman aýal bugdaý ununy da:ş eder.
* * *
Ýagşy aýal işli bolar, ýaman aýal – dişli.
* * *
Ýagşy aýal öý işini gül eder, ýaman aýal gazananyň kül eder.
* * *
Ýagşy başyňa dost, ýaman – aşyňa.
* * *
Ýagşy baýkap sözlär, ýaman – çaýkap.
* * *
Ýagşy berýänçä, ýaman howlugar.
* * *
Ýagşy bilen bolsaň goňşy, işiň zowky-sapa bolar,
Ýaman bilen bolsaň goňşy, işiň jebri-jepa bolar.
* * *
Ýagşy gören dostuňa ýagşy gören zadyňy ber, göre-göre guwansyn.
* * *
Ýagşy gyz irden turup darak sorar, ýaman gyz irden turup – çörek
* * *
Ýagşy bilen sözleşseň köňül açylar.
* * *
Ýagşy bilen ýoldaş bolsaň, uzak ýoluň daş bolmaz.
* * *
Ýagşy ili bilen magtanar, ýer – käni bilen.
* * *
Ýagşy oguldan rehmet ýagar, ýaman oguldan –mähnet.
* * *
Ýagşylyk et, derýa at, balyk biler,
Balyk bilmese, Halyk biler.
* * *
Ýagşynyň köňlünde kine az bolar.
