Gyş günleriň birinde eşekli adam doňan derýanyň üstünden geçip barýan eken. Şonda taýyp, onuň eşegi aýagyny döwdüripdir.
Ol adam lapykeç bolup:
— Eý, doň dogan! — diýipdir. — Sen nähili güýçli, eşekli barýarkam ýykdyň!
Doň şeýle jogap beripdir:
— Eger men güýçli bolýan bolsam, Gün meni eredip bilmezdi.
Onda ol adam Günden sorapdyr:
— Eý, Gün dogan! Sen iň güýçlümi?
Gün şeýle jogap beripdir:
— Eger men güýçli bolýan bolsam, bulut meniň gözüme perde bolup bilmezdi.
— Eý, bulut dogan! Iň güýçlüsi senmi? — diýip, ol adam bulutdan sorapdyr.
— Eger men güýçli bolan bolsam, ýagyş bolup dökülermidim? — diýip, bulut jogap beripdir.
Şonda ol adam:
— Eý, ýagyş dogan! Iň güýçlüsi senmi? — diýip sorapdyr.
Bulut:
— Eger men güýçli bolýan bolsam, toprak meni siňrip bilermidi? — diýip jogap beripdir.
Adam toprakdan sorapdyr:
— Ene toprak! Iň güýçlüsi senmi? — diýip.
Ene toprak jogap beripdir:
— Eger men güýçli bolýan bolsam, ot-çöp menden bereket tapyp, boý alarmydy? — diýipdir.
Onda adam ot-çöpe ýüzlenipdir:
— Mähirli ot-çöp! Iň güýçlüsi senmi?
— Eger men güýçli bolýan bolsam, sygyr meni ýolarmydy, iýermidi?
Adam sygyrdan sorapdyr:
— Eý, sygyr! Iň güýçlüsi senmi?
— Eger men güýçli bolýan bolsam, möjek meni iýermidi?
Onda adam möjekden:
— Möjek dogan! Iň güýçlüsi senmi? — diýip sorapdyr.
Möjek diýipdir:
— Eger men güýçli bolýan bolsam, awçy meni awlarmydy?
Adam awça ýüzlenip:
— Awçy dogan! Iň güýçlüsi senmi? — diýýär.
Awçy diýipdir:
— Eger men güýçli bolýan bolsam, syçan meň okdanymy deşermidi?
Adam syçana ýüzlenip:
— Syçan dost! Iň güýçlüsi senmi? — diýip sorapdyr.
Syçan-da:
— Eger men güýçli bolýan bolsam, garynjalar meni dişlärmidi? — diýip jogap beripdir.
— Garynja dogan! Senden güýçli kim bar? — diýip, adam garynjadan sorapdyr.
— Men iň güýçlüsi! — diýip, garynja aýdypdyr. Adam muňa ynanmandyr. Onda garynja:
— Seniň kakaňyň üç müň put bugdaýyny men dagdan aşyryp iýdim, seniň bajaňyň üç müň put arpasyny dagyň ýedi geçelgesinden geçirip iýdim. Men güýçli bolman, kim güýçli! Men güýçli!
— Seniň näme üçin garnyň uly? — diýip, adam sorapdyr.
— Meniň bagrym uly — diýip, garynja jogap beripdir.
— Näme üçin seniň biliň inçe? — diýip, adam aýdypdyr.
— Meniň çekýän zähmetim agyr — diýip, garynja aýdypdyr.
— Onda näme üçin seniň kelläň uly? — diýip, adam ýene sorapdyr.
— Meniň akylym uly, şonuň üçin. Menden güýçli hiç kim ýok! Men güýçli! — diýip, garynja onuň soragyna jogap beripdir.
