MILLI BAHAR BAÝRAMY

Hemmeler birek-biregi mübäreklemäge howlugyp, toý üýşmeleňine ýönelýärler. Birden barylýar welin, giň sährada jümjümeli güllerdir terje otlaryň dürterşip çykyp durmagy, ho-ol uzaklarda eliň aýasynda ýaly bolup görünýän owlak-guzularyň ine-gana otlap ýörüşleri, töwerekde oglan-gyzlaryň: «Aýterek-günterek, bize Nowruz atly oglan gerek» diýşip, milli oýnumyzyň özboluşlylygyny döredip duran pursatlary, berdaşly bilekli oglanlaryň bil tutuşyp, garşydaşyny hallan atdyrjak bolup, türkmen göreşini tutuşlary, çakganlylar ýaglyga towusmaklary hakydaňy arzuw-umytlar bilen, buýsanç-guwanç duýgular bilen doldurýar.

Hatar-hatar ak öýler dikilen. Golaýynda gül döredip, keçe basýan gelin-gyzlar milliligi janlandyrýarlar, saçlary iki örümli gulpajyklyja gyzlar bolsa, türkmen gyzyna mahsus edep-ekramy bilen terbiýäniň ajaýyp nusgasyny görkezýärler, el ýardamçylaryna öwrülýärler.

Halkymyzyň mukaddesligi saýylýan tamdyrdan gyzgynjak mele-myssyk çöregi sowjak suwa batyryp, kiçijek çagajyklara paýlap duran enäniň şol pursadyny foto enjamy arkaly müdimileşdiresiň gelýär. Bu seni biygtyýar özüne maýyl edýär.

Toý jümmüşinde daş-töweregiňe diňşirgenip dursaň, bir ýerlerden gopuzyň jadyly owazy gulagyňa geler. Şol tarapa ýöräp başlarsyň welin, birden, gudratly aýdymdyr saza sakga saklananyňy duýman galarsyň. Silkme telpegini ikiýana çaýkap, aram-aram gök çaýdan süzüp, şatutdan ýasalan dutarynyň kirişlerine uly ynam bilen kakýan bagşynyň: «Eheeeý... Arkadagly Serdar bilen öňe barýas, öňe barýas, toý donuny geýip, toýa barýas, toýa barýas...» diýen joşgunly aýdymyna synyň oturar. Bu hoş owaza imrinip, gulak bilen göze öwrülýärsiň. Arasynda: «Haý, berekella bagşy, çal bagşy, joş bagşy» diýip, goşulyp goýberýärsiň. Owaz bolsa, ýüregiň damarlaryny yzarlap, kalbyň taryna kakyp goýberýär.

Biz Nowruz baýramyny bellesegem ýa Gurbanlyk toýuny toýlasagam, hiňňildikde uçýarys. Ine, Nowruz baýramynyň giň gerimli dabarasynda hem oglan-gyzlar uly şatlyk-şowhun bilen hiňňildigiň ýakymyna-ýalkymyna, lezzetine berilýärler. Hiňňildike uçup, toýa özboluşly öwüşgin çaýýarlar.

 

Aýna HOJAMOWA,

“Demirýollary” açyk görnüşli paýdarlar

jemgyýetiniň Ilkinji Ýaşlar guramasynyň

Sanly ulgam boýunça hünärmen.

Meňzeş habarlar