Berkarar döwletiň täze eýýamynyň Galkynyşy döwrüniň Arkadag Serdarly bagtyýar ýaşlar ýylynda türkmen halkynyň Milli Lideri, Türkmenistanyň Halk Maslahatynyň başlygy Gahryman Arkadagymyzyň başyny başlan ýaşlar baradaky parasatly syýasaty hormatly Prezidentimiz Arkadagly Serdarymyz tarapyndan üstünlikli durmuşa geçirilýär. Türkmenistanyň Magtymguly adyndaky Ýaşlar guramasynyň ÝUNESKO-nyň Bütindünýä Ýaşlar jemgyýetiniň resmi agzalygyna kabul edilmegi hem munuň aýdyň subutnamasydyr. Şol mynasybetli, golaýda Daşoguz welaýatynyň Daşoguz şäher häkimliginde «Arkadag Serdarly bagtyýar ýaşlar — geljege ynamly barýar, belentdir başlar» atly dabaraly maslahat geçirildi. Bu çäräni Türkmenistanyň Magtymguly adyndaky Ýaşlar guramasynyň Daşoguz welaýat Geňeşi gurady. Oňa Ýaşlar guramasynyň Daşoguz welaýat, şäher, etrap Geňeşleriniň işgärleri, Ilkinji Ýaşlar guramalarynyň başlyklary, işjeň agzalary, welaýatyň bilim, saglygy goraýyş, medeniýet we sport ulgamynyň wekilleri gatnaşdylar.
Dabaraly maslahatda Türkmenistanyň Magtymguly adyndaky Ýaşlar guramasynyň Daşoguz welaýat Geňeşiniň başlygy, Türkmenistanyň Mejlisiniň deputaty Magsat Otuzow, Türkmenistanyň Magtymguly adyndaky Ýaşlar guramasynyň Daşoguz welaýatynyň Daşoguz şäher Geňeşiniň başlygy Sabyrgeldi Begow, Akdepe etrabynyň Orazgeldi Ärsaryýew adyndaky medeniýet öýüniň tans goýujysy Humar Kadyrowa, Daşoguz şäherindäki daşary ýurt dillerine ýöriteleşdirilen 28-nji orta mekdebiniň mugallymy, Türkmenistanyň Ýaşlar baýragynyň eýesi Bossan Mürzäýewa, Türkmenistanyň Magtymguly adyndaky Ýaşlar guramasynyň Daşoguz welaýatynyň Köneürgenç etrap Geňeşiniň Guramaçylyk bölüminiň müdiri, Türkmenistanyň ýaşlarynyň arasynda geçirilen ylmy işler boýunça bäsleşigiň ýeňijisi Gurbanmyrat Gurbanow, Görogly etrabynyň 13-nji orta mekdebiniň mugallymy, Ilkinji Ýaşlar guramasynyň başlygy Döwran Atamedow, Türkmenistanyň Senagatçylar we telekeçiler partiýasynyň Daşoguz welaýat komitetiniň partiýa guramaçysy Döwran Atabaýew hem-de Köneürgenç etrabynyň 16-njy orta mekdebiniň mugallymy, Türkmenistanyň Ýaşlar baýragynyň eýesi Oguljennet Begmyradowa dagylar çykyş etdiler. Çykyşlarda eziz Diýarymyzyň ýaşlar baradaky döwlet syýasatynyň diňe bir ýurdumyzyň çäginde däl-de, eýsem halkara derejesinde giňden ykrar edilýändigi, türkmen ýaşlarynyň Watanymyzyň halkara abraýyny has-da belende galdyrmakdaky tutýan wajyp orny babatda buýsanç bilen giňden bellenip geçildi. Dabarada welaýatyň Daşoguz şäheriniň medeniýet merkeziniň ýaş aýdym-saz ussatlarynyň ýerine ýetiren ajaýyp aýdymlary türkmen halkynyň Milli Lideri Gahryman Arkadagymyza, hormatly Prezidentimiz Arkadagly Serdarymyza alkyş sözleri bolup ýaňlandy.
Mämmetjan BABAÝEW,
TMÝG-niň Daşoguz welaýat Geňeşiniň
sanly ulgam boýunça esasy hünärmeni.
