Geçen hepdäniň anna güni hormatly Prezidentimiz Türkmenistanyň Ministrler Kabinetiniň şu ýylyň birinji çärýeginiň jemlerine bagyşlanan giňişleýin mejlisini geçirdi. Mejlise parlamentiň wekilleri, welaýatlaryň, şäherleriň we etraplaryň häkimleri, ýokary okuw mekdepleriniň rektorlary, gazetleriň we žurnallaryň redaktorlary we beýleki ýolbaşçylar çagyryldy.
Hökümetiň giňişleýin mejlisinde ýurdumyzy durmuş-ykdysady taýdan ösdürmegiň maksatnamasynda kesgitlenen wezipeleri durmuşa geçirmek, milli ykdysadyýetimiziň ösüşini we umuman, halkymyzyň ýaşaýyş-durmuş derejesini ýokarlandyrmak, milli ykdysadyýetimizi sanly ulgama geçirmek, ykdysadyýetimize mümkin boldugyça maýa goýumlaryny köpräk çekmek boýunça netijeli çäreleri görmek, ýurdumyzy senagat taýdan ösdürmek, daşary ýurtlardan getirilýän harytlaryň ornuny tutýan önümleri özümizde öndürmek we eksporta iberilýän harytlaryň möçberini artdyrmak boýunça kabul edilen maksatnamalary ýerine ýetirmek boýunça möhüm wezipelere garaldy.
Şu ýylyň birinji çärýeginde ýurdumyzda alnyp barlan işleriň netijeleri, Garaşsyz, hemişelik Bitarap döwletimiziň ykdysadyýetiniň göz öňünde tutulan maksatnamalara laýyklykda ösmegini dowam edýändigini aýdyň görkezýär. Mejlisde habar berlişi ýaly, hasabat döwründe halk hojalyk toplumynyň ähli pudaklarynda ýokary önümçilik görkezijileri gazanyldy. Ýagny jemi içerki önümiň ösüş depgininiň 6,2 göterim derejesinde üpjün edilmegi munuň aýdyň subutnamasy bolup durýar. Şonuň ýaly-da, hasabat döwründe ýurdumyzyň edaralarynda we kärhanalarynda ortaça aýlyk zähmet hakynyň geçen ýylyň birinji çärýegi bilen deňeşdirilende, 9,4 göterim ýokarlanmagy, zähmet haklarynyň, pensiýalaryň, döwlet kömek pullarynyň we talyp haklarynyň öz wagtynda hem-de doly tölenilmegi döwletiň ykdysady mümkinçilikleriniň ýokarydygyny mynasyp şöhlelendirýär.
Berkarar döwletimiziň bagtyýarlyk döwründe ýurdumyzyň iri maýa goýumlary goýbermek bilen baglanyşykly işjeňliginiň möhüm görkezijileriniň biri hökmünde ähli welaýatlarda önümçilik we durmuş-medeni maksatly desgalaryň gurluşyklary alnyp barylýar. Bu babatda aýdylanda, ýanwar-mart aýlarynda «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasynyň» çäklerinde, şu ýyl üçin göz öňünde tutulan 240 desganyň 84-sinde taýýarlyk we gurluşyk-gurnama işlerine girişildi.
Ýurdumyzda hususan-da, geçen ýylyň degişli döwri bilen deňeşdirilende, önümleriň dürli görnüşlerini, şol sanda oba hojalyk hem-de azyk önümlerini öndürmegiň artdyrylandygy, ulag ulgamynda görkezijileriň ösüşiniň hasaba alnandygy, ulaglaryň ähli görnüşleri boýunça ýük dolanyşygynyň we ýolagçy dolanyşygynyň artandygy, aragatnaşyk pudagynda netijeleriň ýokarlanandygy, ykdysadyýetiň döwlete dahylsyz ulgamynda ösüş gazanylmak bilen, jemi öndürilen önümiň düzüminde onuň paýynyň 63,3 göterime barabar bolandygy baradaky statistik hasabatlar aýratyn guwandyryjydyr.
Ministrler Kabinetiniň mejlisinde şu ýylyň ýanwar-mart aýlarynda milli bilim ulgamynyň maddy-enjamlaýyn binýadyny pugtalandyrmak, okuw maksatnamasyna öňdebaryjy çemeleşmeleri, täzeçil tehnologiýalary we bilimiň hilini ýokarlandyrmaga, zehinli, ukyply ýaşlary ýüze çykarmaga we olaryň intellektual ösüşini höweslendirmäge mümkinçilik berýän usullary ornaşdyrmak boýunça alnyp barylýan işler barada hasabat berildi. Bu ugurda, esasy bellenilmeli zatlaryň biri hormatly Prezidentimiz tarapyndan işlenip taýýarlanylan Türkmenistanda sanly ykdysadyýeti ösdürmegiň Konsepsiýasyny durmuşa geçirmek, şeýle hem döwletiň we jemgyýetiň okgunly ösüşiniň möhüm şertleriniň biri bolan sanly bilimi ösdürmek boýunça işler dowam etdirilýär.
Şeýle hem ýurdumyzda bedenterbiýäni we sporty, olimpiýa hereketini, bu ulgamda halkara hyzmatdaşlygyny ösdürmek boýunça uly işler alnyp barylýar. 2020-nji ýylda Ýaponiýanyň paýtagty Tokio şäherinde geçiriljek XXXII tomusky Olimpiýa oýunlaryna türkmen türgenleriniň ýokary derejede taýýarlyk görmegini üpjün etmek üçin, Türkmenistanyň ýygyndy toparynyň agzalarynyň okuw-türgenleşikleri dowam etdirilýär. Milli Liderimiziň parasatly ýolbaşçylygynda Türkmenistan Watanymyzda raýatlaryň saglygyny goramak, bedenterbiýe we sport hereketini ösdürmek döwlet syýasatynyň esasy ugurlarynyň biri bolup durýar.
Bitarap Türkmenistanyň daşary syýasatda gazanýan üstünlikleri, onuň dünýä bileleşiginde häzirki zamanyň möhüm global meseleleriniň çözgüdini özünde jemleýän başlangyç ugry, dünýä döwletleri bilen özara düşünişmek we hyzmatdaşlyk ýörelgelerine eýerýän işjeň gatnaşyklary ýurdumyzyň dünýä ýüzündäki abraýyny barha ýokarlandyrýar. Halkara hyzmatdaşlygynyň ösüşinde ýokary derejeli saparlar esasy orun eýeleýär. Şunuň bilen birlikde, Owganystan Yslam Respublikasynyň Prezidentiniň hem-de Bahreýniň Patyşasynyň ýurdumyza saparlaryny bellemek bolar. Ýakynda bolsa Koreýa Respublikasynyň Prezidenti ýurdumyza döwlet saparyny amala aşyrar. Döwlet Baştutanymyz öňde boljak ýokary derejedäki ikitaraplaýyn gepleşikleriň jemleri boýunça dürli ugurlardaky hyzmatdaşlygyň kadalaşdyryjy-hukuk binýadyny pugtalandyrmaga, uzakmöhletleýin esasdaky netijeli gatnaşyklaryň ösdürilmegine täze itergi bermäge gönükdirilen resminamalaryň toplumyna gol çekilmeginiň göz öňünde tutulýandygyny belläp, ol saparyň ýokary guramaçylyk derejesini üpjün etmegi tabşyrdy.
Mundan başga-da, Ministrler Kabinetiniň giňişleýin mejlisinde Oba milli maksatnamasyndan gelip çykýan wezipeleri üstünlikli berjaý etmek boýunça alnyp barylýan işlere hem aýratyn üns berildi. Oba milli maksatnamasyna laýyklykda, häzirki döwürde ýurdumyzyň ähli welaýatlarynda iri senagat we durmuş maksatly desgalaryň gurluşygy, şol sanda täze şäherçeleriň, ýaşaýyş jaýlarynyň, dynç alyş we saglyk merkezleriniň, mekdepleriň, çagalar baglarynyň we ençeme beýleki desgalaryň gurluşygy dowam edýär. Bu asylly işleri geljekde hem giň gerim bilen dowam etdirmek maksady bilen, hormatly Prezidentimiz «Altyn asyr» Türkmen kölüniň sebitini 2019 — 2025-nji ýyllarda ösdürmegiň Konsepsiýasyny tassyklamak hakyndaky» hemde «Balkan welaýatynyň Serdar etrabynda täze, döwrebap obany gurmak hakyndaky» Kararlara gol çekdi we resminamalarda görkezilen çäreleriň öz wagtynda hem-de ýokary hilli ýerine ýetirilmegi ugrunda zerur tagallalary görmegi boýunça tabşyryklary berdi.
Umuman, geçen üç aýyň dowamynda ýerine ýetirilen işleriň netijeleri, ýurdumyzyň ykdysady ösüşiniň binýadynyň berkdigini, kabul edilen maksatnamalaryň üstünlikli durmuşa geçirilýändigini, şunuň bilen birlikde, öňde durýan möhüm wezipeleriň berjaý edilmegi ugrunda ähli çäreleriň görülýändigini ýene bir gezek aýdyň görkezdi.
“Nesil” gazeti,
16.04.2019ý.
