26-njy awgustda hormatly Prezidentimiziň Singapur Respublikasyna döwlet saparynyň çäklerinde türkmen-singapur işewürler maslahaty geçirildi.
Oňa Singapuryň 40-dan gowrak iri kompaniýalarynyň wekilleri, nebitgaz, himiýa, energetika, oba hojalygy we azyk senagaty, gurluşyk senagaty, ulag we aragatnaşyk ulgamy, gämi gurluşygy, söwda, bank işi, programma üpjünçiligini işläp taýýarlamak we beýleki ugurlar boýunça ýöriteleşdirilen kompaniýalary gatnaşdylar. Ýurdumyzyň dürli ministrlikleriniň we pudaklaýyn dolandyryş edaralarynyň ýolbaşçylary, hünärmenleri, Senagatçylar we telekeçiler birleşmesiniň agzalary Türkmenistana wekilçilik etdiler.
«Shangri-La» myhmanhanasynyň maslahatlar zalynyň eýwanynda ýurdumyzyň eksport harytlarynyň sergisi guraldy. Onda dokma senagatynyň önümleri, ýüplükler, matalar, taýýar önümler, şol sanda jinsi önümleri, sowgatlyk toplumlar, aşhana we hammam serişdeleri, ýüpek önümler we halylar görkezildi. Türkmenistanyň himiýa, nebitgaz, oba hojalygynyň we azyk senagatynyň bölümleriniň bolmagy serginiň özüne çekijiligini artdyrdy. Sergide Türkmenbaşy şäheriniň Halkara deňiz porty öz bölümini ýerleşdirdi. Onda portuň ýolagçy we söwda floty, ýükleri düşürmegiň, ýüklemegiň mümkinçilikleri, gämi gurluşyk we abatlaýyş zawodynyň mümkinçilikleri barada gürrüň berýän şekiller bar. Şeýle hem Diýarymyzyň eksport harytlarynyň sergisinde derman serişdeleri bilen bir hatarda, türkmen topragynda bitýän dermanlyk ösümliklerden taýýarlanylan içgiler, fitoserişdeler, buýan köküniň şiresi, mineral serişdelerden taýýarlanylan kosmetiki önümler görkezildi. Serginiň düzüminde öý hojalygyna degişli dokma önümleri, dürli lybaslar, ýuwujy serişdeler, deriden taýýarlanan gelşikli aýakgaplar, azyk harytlary, miwe suwlary, konditer önümleri, gawundan taýýarlanan süýji önümleriň bolmagy baý mazmuna eýe etdi. Soňra foruma gatnaşyjylar myhmanhananyň maslahat zalyna ýygnandylar. Maslahaty Singapuryň Işewürler federasiýasynyň başlygy Teo Siong Seng açdy. Bellenilişi ýaly, bu federasiýa 25 müň 800 kompaniýany, şeýle hem ýerli we daşary ýurtly işewürler edaralaryny özünde jemleýär.
Onuň aýdyşy ýaly, Türkmenistan bilen Singapuryň 2018-nji ýyldaky söwda dolanyşygy 2016-njy ýyl bilen deňeşdirilende 5 esse artdy.
Şeýlelikde, Singapuryň we Türkmenistanyň kompaniýalarynyň, guramalarynyň arasyndaky gatnaşyklara badalga berildi. Singapuryň kompaniýalary himiýa senagatyndaky, şeýle hem hususy bilim ulgamyndaky hyzmatdaşlygyň mümkinçiliklerini öwrenýärler. Singapuryň «Indorama» kompaniýasy we «Türkmenhimiýa» döwlet konserni 2018-nji ýylyň başlarynda ikitaraplaýyn gepleşikleri geçirdi we şolaryň arasynda özara düşünişmek hakyndaky Ähtnama maslahatyň dowamynda gol çekildi. Mundan başga-da ýene birnäçe resminama gol çekilmäge taýýar edildi.
Türkmenistanyň ykdysadyýetiniň ileri tutulýan pudaklarynda Singapuryň kompaniýalarynyň gatnaşmagynda durmuşa geçirilýän taslamalaryň bilelikde maliýeleşdirilmegine aýratyn üns berildi. Nebitgaz, nebit we gazhimiýa, senagatyň himiýa pudaklary, ulag hem-de telekommunikasiýa düzümlerini ösdürmegiň taslamalary geljegi has uly ugurlar hasap edilýär.
Beýik Ýüpek ýoly döwründe Türkmenistanyň çägi Gündogar bilen Günbataryň arasynda söwda gatnaşyklaryny ösdürmekde baglanyşdyryjy merkez bolup hyzmat edipdir. Häzirki taryhy şertlerde ýurdumyz yklymüsti ugurlaryň möhüm ulag geçelgesi hökmündäki wezipesini ýerine ýetirýär. Şunuň bilen baglylykda, bu gezekki maslahat ikitaraplaýyn söwda-ykdysady we maýa goýum hyzmatdaşlygy üçin mümkinçilikleri giňeltmek bilen çäklenmän, eýsem, has giň gerimdäki halkara gatnaşyklaryň ösdürilmegine goşant goşmakda hem örän ähmiýetli bolup durýar.
Mahlasy, Türkmenistan bilen Singapuryň söwda-ykdysady hyzmatdaşlygy öz ösüşinde täze derejä çykýar we oňa has köp kompaniýalar hyzmatdaşlyga çekilýär. Şeýlelikde, işewür gatnaşyklar, däp bolan ugurlarda bolşy ýaly, beýleki pudaklarda-da netijeli dowam etdirilýär.
“Nesil” gazeti,
29.08.2019ý.
