Her ýylyň 1-nji iýunda giňden bellenilýän Çagalary goramagyň halkara gününi ýurdumyzda dabaraly belläp geçmek, indi asylly däbe öwrüldi.Tomus paslynyň ilkinji gününde giňden bellenilýän bu halkara baýramyň şanyna aýdym-sazly baýramçylyk dabaralar, medeni çäreler geçirilýär.
Ýaňy-ýakynda şu şanly senä bagyşlanyp, Mary welaýat häkimliginiň «Bagt köşgi» toý-dabaralar merkezinde baýramçylyk dabarasy geçirildi. Türkmenistanyň Magtymguly adyndaky Ýaşlar guramasynyň Mary welaýatynyň Mary şäher Geňeşiniň, Türkmenistanyň Senagatçylar we telekeçiler Partiýasynyň welaýat komitetiniň, Mary welaýat häkimliginiň «Bagt köşgi» toý-dabaralar merkeziniň hem-de Türkmenistanyň Parahatçylyk gaznasynyň müdirýetiniň Mary welaýat bölüminiň bilelikde guramagynda geçirilen çäre «Gül Watanyň buýsanjy siz çagalar!» diýlip atlandyryldy. Bu dabara ady agzalan guramalaryň wekilleri, Mary şäheriniň orta mekdeplerinde bilim alýan we çagalar baglarynda terbiýelenýän döwletli çagalaryň ençemesi gatnaşdylar.
Çagalary goramagyň halkara gününe bagyşlanyp geçirilen baýramçylyk dabarasynda Mary şäheriniň «Joşgun», «Altyn nesil» çagalar we ýetginjekler döredijilik öýleriniň we welaýat medeniýet müdirliginiň çagalar sungat mekdepleriniň taýýarlan aýdym-sazly şowhunly çykyşlaryna tomaşa edildi. Aýdym-sazyň şowhunly owazy labyzly okalan goşgular bilen sazlaşykly utgaşdy.
Uly täsirlere beslenip geçirilen baýramçylyk çäresiniň ahyrynda oňa gatnaşanlar ýurdumyzy ýagty geljege sary alyp barýan, bagtyýar çagalara okamaga, öwrenmäge giň mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň adyna alkyş sözlerini aýtdylar.
Annagözel SARYÝEWA,
TMÝG-niň Mary welaýatynyň Mary şäher
Geňeşiniň Guramaçylyk bölüminiň müdiri.
