Ýaňy-ýakynda Türkmenistanyň Magtymguly adyndaky Ýaşlar guramasynyň Mary welaýatynyň Mary şäher Geňeşiniň hem-de ÝUNESKO-nyň Assosirlenen Mary şäherindäki 24-nji zehinli ýaşlar mekdebiniň bilelikde guramagynda «Magtymguly Pyragy dünýä ähmiýetli şahsyýet» atly maslahat duşuşygy geçirildi. Magtymgulynyň golýazmalar toplumynyň ÝUNESKO-nyň «Dünýä hakydasy» maksatnamasynyň halkara sanawyna girizilmegi mynasybetli guralan duşuşyga şol mekdepde bilim alýan okuwçy ýaşlar gatnaşdylar.
Duşuşykda TMÝG-niň Mary welaýatynyň Mary şäher Geňeşiniň Guramaçylyk bölüminiň müdiri Annagözel Saryýewa, baş hünärmeni Göwher Kakageldiýewa, ÝUNESKO-nyň Assosirlenen Mary şäherindäki 24-nji zehinli ýaşlar mekdebiniň koordinatory Jeren Badyýewa dagylar çykyş etdiler.
Çykyş edenler Hormatly Prezidentimiz Arkadagly Gahryman Serdarymyzyň baştutanlygynda üstünlikli durmuşa geçirilýän medeni diplomatiýanyň, şol sanda görnükli nusgawy şahyrymyz Magtymguly Pyragynyň umumadamzat medeni hazynasynyň aýrylmaz bölegi hasaplanýan gymmatly mirasy, olary öwrenmek we wagyz etmek boýunça alnyp barylýan işleriň üstünliklere beslenýändigi dogrusynda gürrüň berdiler. Şeýle hem, ÝUNESKO-nyň «Dünýä hakydasy» maksatnamasynyň dünýä ýurtlarynyň we halklarynyň gadymy ýazuw ýadygärliklerini-kagyz ýüzünde bolşy ýaly, ses ýazgysynda, sanly ulgamda we beýleki görnüşde ägirt uly gymmatlygy bolan resminamalar toplumyny gorap saklamak bilen bagly halkara taslama bolup durýandygy aýratyn belläp geçildi.
Maslahatyň dowamynda mekdebiň okuwçylary nusgawy şahyrymyz Magtymguly Pyragynyň goşgularyny uly buýsanç bilen okadylar.
Annagözel SARYÝEWA
TMÝG-niň Mary welaýatynyň Mary şäher
Geňeşiniň guramaçylyk bölüminiň müdiri.
