Berkarar döwletiň täze eýýamynyň Galkynyşy döwründe agrosenagat toplumy milli ykdysadyýetimizde möhüm orny eýeleýän pudaklaryň biridir. Şonuň üçinem bu ulgamyň ägirt uly mümkinçiliklerini netijeli peýdalanmak, oba hojalyk ekinlerinden bol hasyl almak, daşarky bazarlardan getirilýän dürli harytlaryň öwezini ýurdumyzda öndürilýän ýokary hilli, tebigy taýdan arassa, bäsdeşlige ukyply önümler bilen doldurmak, onuň eksport mümkinçilikleriniň gerimini giňeltmek Arkadagly Serdarymyzyň oba-senagat toplumynda üstünlikli durmuşa geçirýän ägirt uly özgertmelerinde esasy orny eýeleýär. Şunda döwlet üçinem, kärendeçiler üçin-de düşewüntli bolan pagtaçylygy giňden ösdürmek hem esasy şertleriň biridir.
Häzirki wagtda ýokary depginde dowam edýän pagta ýygymy ýurdumyzyň günbatar sebitiniň iri oba hojalyk etraplarynyň biri bolan Serdar etrabynda hem döwrüň ösen talaplaryna laýyk derejede gyzgalaňly alnyp barylýar. Ol ýerlerdäki ak patrak ýaly pagtaly hanalary synlanyňda, göwnüň göterilýär. Etrapda bu möhüm möwsüme gatnaşýan ýygymçylaryňdyr kombaýnlaryň her biriniň netijeliligini ýokarlandyrmak barada edilýän tagallalar aňry ýany ýerine düşýär. Arkadagly Serdarymyzyň oba hojalyk pudagynyň milli ykdysadyýetimizde eýeleýän wajyp ornuny has-da pugtalandyrmaga berýän hemaýat-goldawlary daýhanlarymyza ýokary netijeleri gazanmaga giň mümkinçilikleri berýär. Şu nukdaýnazardan ugur alyp, biz hem Türkmenistanyň Magtymguly adyndaky Ýaşlar guramasynyň Balkan welaýat Geňeşi we etrap-şäher Geňeşleri, beýleki jemgyýetçilik guramalary bilen bilelikde pagta ýygym möwsümini has-da dabaralandyrmak,edermen babadaýhanlarymyzy zähmet üstünliklerine höweslendirmek, ökde ýygymçylary ýüze çykarmak maksady bilen yzygiderli bäsleşikleri gurnap, gymmat bahaly sowgatlar bilen sylaglaýarys.
Baýrambike SAPAROWA,
TMÝG-niň Serdar etrap Geňeşiniň
Guramaçylyk bölüminiň müdiri.
