Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşi etrabyň bilim bölümi bilen bilelikde ýakynda etrabyň 9-njy çagalar bagynda “Ýaş nesillerimiziň saglygy – döwletimiziň baş baýlygy” atly wagyz-nesihat ýygnagyny geçirdi. Mekdebe çenli çagalar edaralarynyň işlerini kämilleşdirmek, çagalar baglarynda körpelere döredilýän şertleri ýokarlandyrmak, gyşky möwsüme taýýarlyk işlerini guramaçylykly, talabalaýyk guramak maksady bilen geçirilen bu duşuşykda ýerli jemgyýetçilik guramalarynyň hem-de bilim ulgamynyň wekilleriniň çykyşlary diňlenildi. Çykyşlarda çagalar bagynda terbiýelenýän çagalaryň geýnişine, iýmitine, kadaly ösüşine berilýän ünsi güýçlendirmek, howanyň sowamagy bilen çagalar otaglarynyň ýyladylyşyny kadaly derejede saklamak, arassaçylyk-gigiýena düzgünlerini berk berjaý etmeklik barasynda giňişleýin bellenip geçildi.
