Türkmenistanyň Magtymguly adyndaky Ýaşlar guramasynyň Daşoguz welaýatynyň Saparmyrat Türkmenbaşy etrap Geňeşi, etrabyň merkezi kitaphanasynda “Maşgala mukaddesligi – halkymyzyň milli terbiýesiniň gönezligidir” ady bilen wagyz-nesihat çäresini geçirdi. Bu çärä etrabyň merkezi kitaphanasynyň, çagalar ýetginjekler we sungat mekdebiniň işgärleri we jemgyýetçilik guramalaryň wekilleri gatnaşdylar.
Duşuşykda çykyş edenler, hormatly Prezidentimiziň Türkmenistanyň Magtymguly adyndaky Ýaşlar guramasynyň VII Gurultaýynda: «Halallyk we maşgala gymmatlyklaryna ygrarlylyk ýaşlaryň baş ýörelgesine öwrülmelidir. Ýaş ynsanda şeýle häsiýetleri terbiýelemek Ýaşlar guramasynyň belent borjy we baş maksady bolmalydyr» diýen ganatly jümlelerini bellemek bilen, Arkadagly Serdarymyzyň öňde goýan wezipelerinden ugur alyp, şeýle-de, ýaşlary maşgala durmuşyna taýýarlamak, maşgala mukaddesligine söýgi döretmek, at-abraýyny saklamak we goramak babatda giňişleýin gürrüňler edildi.
