Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşi etrabyň bilim bölümi bilen bilelikde golaýda Hüdük Myradow adyndaky geňeşligindäki taryhy muzeýe gezelenç çäresini gurady. “Bulary bilmek gyzykly” atly şygar astynda geçen gezelenç çäresine etrabyň 28-nji orta mekdebiniň ýokary synp okuwçylary gatnaşdylar.
Berkarar döwletiň täze eýýamynyň Galkynyşy döwründe hormatly Prezidentimiz, Arkadagly Serdarymyzyň parasatly ýolbaşçylygynda milli mirasymyz, taryhy ýadygärliklerimiz bilen baglanyşykly alnyp barylýan işleriň gerimi barha giňeýär. Ýurdumyzyň çar künjeginde ýerleşýän, gadymyýetiň syrlaryny özünde saklap ýatan taryhy ýadygärlikleri ylmy taýdan öwrenmek işleriniň yzygiderli alnyp barylýandygyny göreniňde, Diýarymyzdaky muzeýlerde saklanýan, halkymyzyň geçmiş ýolundan söz açýan gymmatlyklary synlanyňda göwnüň göterilýär. Her bir halkyň taryhyny, geçmişini, däp-dessurlaryny, edim-gylymlaryny, ýaşaýyş durmuşyny, medeniýetini açyk-aýdyň şöhlelendirýän medeniýet ojagy – muzeýlerdir. Şeýle muzeýleriň biri, Görogly etrabynyň Hüdük Myradow adyndaky geňeşliginde ýerleşýär. Bu ýerde etrabyň çäginden toplanan muzeý gymmatlyklary aýawly saklanylýar. Bu taryhy muzeýiň wekili Ýeňişmyrat Baýramowyň aýtmagyna görä, muzeýde hemişelik we wagtlaýyn hereket edýän sergi eýwanlary, şeýle hem şekillendiriş sungatyna, etnografiýa, zähmet gurallaryna, söweş gurallaryna, keramika hem-de seýisçilige, obanyň zähmet weteranlarynyň durmuşyna bagyşlanan bölümler hereket edýär. Künde, kürek, çarşak, ýerdemir ýaly zähmet gurallary türkmen halkynyň ýaşaýyş-durmuş şertleri hakynda baý maglumatlary özünde jemleýär. Küfi, ormaç (golça), soky, susak, sebet, kersen, tikeç, kendirik, repide, hona, çuwal, kündük, tüňçe, çaga gulakçynlary, agar don, gyňaç, kürte, bökeje köwüş, bökeje ädik, çokaý, silkme telpek, messi, kümüş şaý-sepler milli mirasymyzyň gymmatly hazynasydyr.
Hum küýzeler, gor küýzeler, ybryk ýaly gymmatlyklar pederlerimizden miras galan küýzegärçilik senediniň ajaýyp nusgalarydyr.
Obanyň oba hojalygynda göreldeli zähmet çeken zähmet hem-de uruş weteranlarynyň suratlary, medallary, şeýle-de, gadymy teňňeler, mata pullar taryhy hem gymmatly maglumatlary bilen bu ýere gelýän halk köpçüliginiň ünsüni özüne çekýär – diýip, muzeýiň wekili okuwçylara bu taryhy muzeýiň gymmatlyklary barada gyzykly gürrüňler berdi.
Türkmen halkynyň taryhy geçmişi bilen içgin tanşan okuwçylar üçin bu gezelenç diýseň täsirli boldy. Olar bu ýerde kitabyň üsti bilen nazary bilim alýan taryhy maglumatlarynyň gözli şaýady boldular.
Altyn ATAKOWA,
TMÝG-niň Daşoguz welaýatynyň
Görogly etrap Geňeşiniň bölüm müdiri.
